Kutimuliwa kwa Chiza ni Nape na ukomavu wa kisiasa
KATIBU wa Itikadi na Uenezi wa chama tawala, Chama
Cha Mapinduzi, Nape Nnauye, bado ni kijana kiumri, ila katika siasa anaanza
kuonesha ukomavu uliouzidi wa wengi waliomtangulia kiumri. Hiyo imejionesha
kutokana na Nape kuwatolea uvivu baadhi ya mawaziri wa serikali ya bosi wake,
Rais Jakaya Kikwete, ambaye pia ni mwenyekiti wa chama anachokitumikia Nape,
CCM.
Alichokifanya
Nape cha kutaka mawaziri watatu, Mhandisi Christopher Chiza – Kilimo, Chakula
na Ushirika, pamoja na naibu wake, Adamu Malima, na Waziri wa Elimu na Mafunzo
ya Ufundi, Dk. Shukuru Kawambwa, watimuliwe kazi mara moja, kinawashinda wengi
akiwemo hata aliyewateua kushika nyadhifa hizo, Rais Kikwete mwenyewe.
Fikiria mtu
anapewa nafasi ya kumsaidia rais wake katika kuyatafuta maendeleo ya nchi na
wananchi, mtu huyo anaivurunda, lakini aliyemteua kushika nafasi hiyo anamuonea
haya ya kumuondoa na kuwajaribu wengine ambao wako tele wenye uwezo na nafasi
husika!
Kwahiyo kitendo
cha Nape kusema kwamba mawaziri wanaovurunda nafasi zao watimuliwe kinapaswa
kupongezwa bila kujali anayempongeza anafuata itikadi ya chama gani cha siasa.
Hiyo
inaletwa na ukweli wa kwamba rais ni wa nchi nzima, sio wa CCM, Chadema, CUF
wala chama chochote kingine cha siasa. Hivyo anayoyafanya ni kwa faida ya nchi
yake na watu wake katika ujumla wao bila kuzijali itikadi zao za kisiasa.
Rais anapomteua mtu akamsaidie katika
hilo anakuwa amelenga kwa faida wananchi wake wote kwa ujumla.
Lakini kwa
bahati mbaya wapo baadhi ya watu, hususan wapenzi wa chama anachotoka rais,
wanaokichukulia kama usaliti kitendo cha kuusahihisha uteuzi wa rais bila
kuelewa kwamba kwa kufanya hivyo, kumsahihisha, ni kumsaidia rais vilevile.
Maana rais
sio Mungu, ni binadamu kama tulivyo mimi na wewe. Rais anaweza akajiaminisha na
ujuzi wa mtu katika mambo fulani na hivyo kuona anamfaa katika usaidizi, lakini
hatahivyo ni vigumu kwake kuelewa mambo yatakuwaje pale mtu anapokuwa amenogewa
na nafasi anayokuwa amepewa kumsaidia rais. Uwezo huo anao Mungu peke yake.
Ni kwa
sababu hiyo nataka nimpongeze Nape Nnauye kwa ujasiri wake wa kutamka wazi
kwamba mawaziri ambao mpaka sasa wamegeuka mzigo usiobebeka kwa mteuzi wao
watimuliwe mara moja. Kwa kauli hiyo ni wazi kwamba Nape anampenda rais wake,
nchi yake na wananchi wenzake. Hataki kuwaona wananchi wakiteseka kutokana na
watu wanaojisahau baada ya kuaminiwa na bosi wao. Huo ni ujasiri wa Nape uliotukuka.
Sio rahisi
kujionesha kwamba unampenda rais wako na unamnyenyekea kwa kumuachia ahenyeke
na mambo yanayotokana na maamuzi yake, uko ni kumkomoa rais wako wala sio
kumpenda na kumnyenyekea. Anayempenda na kumnyenyekea rais wake atamsaidia kwa
kumuonesha dosari zilizo kwenye maamuzi yake, kusudi rais azifanyie kazi dosari
hizo na kujiondolea mzigo unaomuelemea ukitishia kumchonganisha na wananchi
anaowatumikia. Hivyo ndivyo alivyofanya Nape.
Katika nchi
zilizoendelea, ambazo tumejizoesha kuzichukulia kana kwamba zina ubia na Mungu,
na hivyo kuziomba misaada ya kila aina kama vile bila zenyewe sisi hatuwezi
kuwepo, huwa hakuna unafiki wa kisiasa.
Kule
inapotokea jambo limeenda kombo katika uendeshaji wa nchi mhusika hasubiri kukumbushwa
na bosi wake ili awajibike, mara moja anaamua mwenyewe kuachia ngazi. Hiyo ni
moja ya jitihada za kumpunguzia bosi wake mzigo, anaonesha upendo kwa bosi
wake. Na mambo yanapokuwa yamezidi hata bosi mwenyewe anaachia ngazi ili
wananchi wakamtafute mwingine wa kuwa kinara wao. Huo nao ni upendo wa kinara
wa nchi kwa watu wake.
Sielewi ni
kwa nini katika nchi nyingi za kimasikini, hususan katika Bara la Afrika, mambo
yanakwenda kinyume pasipo kugundua wala kuhisi kwamba unyume huo ndio
unaotufanya tuwe dhalili mbele ya wenzetu!
Panapotokea
mtu mwenye dhamana fulani anasababisha mambo yaliyo mustakabali wa nchi na
wananchi yaende kombo, ama kwa bahati mbaya, kwa makusudi au kwa uwezo mdogo
alio nao mhusika, lakini anaamua kufumba macho kana kwamba hakuna chochote
kilichotokea, bosi wake naye anaamua kujikalia kimya hapo ni lazima pawe na
hitilafu. Kibaya zaidi hata wananchi, ambao ndio waathirika, nao wanaamua
kutulia tuli!
Wakitusema
wanaotufadhili, ambao kwa njia moja au nyingine tunaamini wana ubia na Mungu,
tunaanzisha malalamiko kwamba wanatudhalilisha! Hivi ni kweli wanatudhalilisha
au tunajidhalilisha sisi wenyewe?
Kwa matiki
hiyo, ndiyo sababu nimeona kuna umuhimu wa kumpongeza Nape Nnauye kwa ujasiri
wake wa kuuweka wazi udhaifu unaojionesha katika mpangilio wa serikali
iliyoteuliwa na bosi wake kichama.
Hata kama
wapo watakaomuona Nape kaenda nje ya mstari, ila kiukweli yeye ndiye
aliyeonesha msaada zaidi kwa bosi wake kuliko walio na nidhamu ya kinafiki ya
kwamba “Mfalme kapendeza kwenye nguo isiyoonekana kwa wenye dhambi tu” kumbe
mfalme yuko uchi!
Katika
mawaziri watatu aliowasema Nape, mimi kwa hapa nitawagusia wawili tu, Chiza na
Malima. Sio kwamba yule mwingine hana tatizo, analo tena kubwa sana, na wizara
anayoisimamia ni nyeti mno. Ila nimeamua kuwaongelea hawa wawili, waziri na
naibu wake, kwa vile nimekuwa nikiiandika wizara hiyo kwa muda mrefu kutokana
na msukumo wa wakulima.
Pamoja na
mambo mengine yanayolalamikiwa na wakulima, jambo kubwa ambalo limelalamikiwa
na wakulima kiasi cha kukalibia kulifanyia matanga baada ya kuona kama
limeshindikana kupatiwa ufumbuzi wa kulinusuru, ni ushirika. Ushirika unakufa
nchini wakati waziri mhusika akiwa na kila nyenzo za kuunusuru ila akiwa
anakosa utashi wa kufanya hivyo.
Kwa kutotaka
kumsaidia bosi wao Waziri Chiza pamoja na Naibu wake, Malima, wako tayari
kuuona ushirika ukiwafia mikononi wakiwa na uhakika kuwa atakayelaumiwa kwa
kifo hicho ni Rais Jakaya Kikwete, kwa vile wananchi, wengi wao wakiwa ni
wakulima, ndiye waliyemchagua ili, pamoja na mambo mengine, akawalindie maslahi yao, na wala
hawakuwachagua mawaziri.
Kufuatia
tatizo hilo nimeandika sana, tena mara nyingi, kumshauri Waziri Chiza aingilie
kati na kuunusuru ushirika kwa kuyatumia mamlaka aliyopewa kikatiba, kwa vile
ni yeye aliye waziri wa Kilimo, Chakula na Ushirika.
Sababu haina
maana mtu kuitwa Waziri wa Ushirika halafu ukakubali kuuona ushirika ukikufia
mikononi ila wewe ukiendelea kunufaika tu na cheo hicho, ambacho kwa hilo
kinakuwa hakina maana yoyote.
Nilijaribu
kumtolea Waziri Chiza mfano halisi wa chama changu kikuu cha ushirika
ninachokifahamu kwa karibu cha KCU (1990) Ltd.. Nilimwambia Chiza kuwa chama
hicho kinakufa kutokana na uongozi wake uliopo kuupa kipaumbele ubinafsi,
ambapo viongozi wa ushirika ndio pekee wanaojinufaisha na ushirika huo wakati
wanaushirika, wakulima, hawaambulii lolote wala kuelewa ni kwa nini kuna kitu
kinachoitwa ushirika.
Alichopaswa
kukifanya Chiza ni kuwaelekeza walio chini yake, hasa Mrajis wa Vyama vya
Ushirika, akautimue uongozi wote wa KCU (1990) Ltd. na kuwambia wanaushirika
wakapange upya safu ya uongozi wa ushirika huo.
Baada ya
kuona kuwa Waziri Chiza, kwa sababu anazozielewa yeye, hakuutilia maanani
ushauri wangu, nikamgeukia Rais Kikwete, nikauliza kwa nini anamuachia Chiza
aunyonge ushirika?
Sikuelewa
Rais Kikwete alilichukuliaje swali langu hilo, ila kusema ukweli nimefarijika
na kauli ya Nape Nnauye ya kwamba Chiza ni mmoja wa mawaziri walio mzigo kwa
Rais Kikwete. Kauli yake ya kwamba mawaziri hao mizigo watimuliwe naiunga mkono
kwa asilimia mia moja.
Naamini
kwamba Nape anaenda sambamba na yanayojitokeza kwa wananchi. Anayaangalia matatizo
yanayowapata wananchi na kuangalia yanasababishwa na nini na yanaweza
kutatuliwaje.
Kwahiyo, kwa
msaada wa Nape, Rais Kikwete anapaswa kupima uzito kati ya wakulima, ambao ndio
wanaounda ushirika, na Chiza, waziri anayeusimamia ushirika, na kisha kuona ni
upande gani wenye uzito zaidi. Sidhani kama rais anaweza kumuona Chiza ndiye
mwenye uzito mkubwa kuliko wakulima,
walio pia wapiga kura wake, kwahiyo
akaamua kumbeba mtu mmoja na kuwatelekeza wakulima walio katika idadi ya
mamilioni.
Kama Chiza
hataki kuonesha upendo kwa bosi wake, kwa kuyatazama anayoyafanya na kuona
kuwa kavurunda sana na kugeuka mzigo
usiobebeka hivyo kuamua mwenyewe kumuondolea mzigo huo bosi wake, basi bosi
anaweza kuonesha upendo kwa msaidizi wake huyo na kumuweka pembeni ili akwajaribu
wengine kutoka kwenye hazina kubwa aliyo nayo isiyopungua idadi ya watu milioni
45, ili wananchi wanaobaki waweze kuendesha maisha yao kwa uhakika na usalama
zaidi.
Narudia
kusema kwamba Nape Nnauye kaonesha ukomavu wa kisiasa ambao sikutegemea kama
ungetoka kwa kijana wa aina yake.
0784 989 512
BUKOBAWADAU
Bukoba Wadau ni mtandao unao toa habari na matukio yanayo tokea katika mji wa bukoba pamoja na mkoa wa kagera kwa ujumla.
Email:bukobawadau@gmail.com | Phone :Mc baraka:0784 505045, 0754 505043
Instagram @bukobawadau | Facebook @bukobawadau
