Upimaji ardhi Ngara waendelea
ZOEZI la upimaji ardhi na utoaji wa hati za kimila kwa wananchi wa Wilaya ya Ngara, mkoani Kagera unaendelea ili kuandaa matumizi bora ya ardhi katika wilaya hiyo.
Mkuu wa Wilaya ya Ngara, Constantine Kanyasu, alibainisha hayo alipokuwa akisoma taarifa kwa Waziri wa Nchi Ofisi ya Rais (Mahusiano na Uratibu), Stephen Wassira katika ziara yake mkoani Kagera mwishoni mwa wiki na kukagua miradi mbalimbali ya maendeleo ikiwemo ya upimaji wa ardhi.
Alisema jumla ya vijiji 72 kati ya 68 vimeshapimwa na vimeshaandaliwa hati za kimila huku vinne vimeandaliwa mpango wa matumizi bora ya ardhi ya kijiji.
Kanyasu alisema utaratibu huo uliofanywa na serikali wa kuanzisha utaratibu wa kutambua mali za wanyonge utawasaidia ikiwa ni pamoja na kutambua ardhi inayomilikiwa na wananchi kwa hatimiliki za kimila.
Alieleza uandaaji wa hatimiliki za kimila unaendelea na hadi sasa jumla ya hati 1,000 zimeshaandaliwa, hati 800 zimechapwa na 710 zimeshagawiwa kwa waombaji mbalimbali kwenye vijiji husika.
Na Julieth John
BUKOBAWADAU
Bukoba Wadau ni mtandao unao toa habari na matukio yanayo tokea katika mji wa bukoba pamoja na mkoa wa kagera kwa ujumla.
Email:bukobawadau@gmail.com | Phone :Mc baraka:0784 505045, 0754 505043
Instagram @bukobawadau | Facebook @bukobawadau
