CHOZI LA SENDEKA NI LA KIUZALENDO AU LA MAMBA?
Na Prudence Karugendo
CHRISTOPHER ole
Sendeka ni mmoja wa wabunge niliokuwa nikiwaona na kuwaamini kuwa wametawaliwa
na uzalendo. Hilo, pamoja na hulka ya
watu wa kabila lake, Wamaasai, ya kutokuwa wanafiki, wakiwa wanaipenda na
kuiheshimu haki pamoja na kuwa waaminifu, vilinifanya nimpende na kumheshimu
mbunge huyo.
Lakini sasa mambo yanayoendelea kwa wakati huu
nchini mwetu yananifanya niukumbuke usemi wa Kiswahili wa kwamba usimcheke
mamba kabla hujavuka mto. Nyakati zina mambo, Sendeka anaonekana kabadilika!
Kwa wakati
huu ambao kila mwananchi anahitajika kuonyesha uzalendo wa kweli kwa nchi yake
tunapotafuta Katiba ya nchi, katiba isiyokuwa ya kichama, kikabila, kidini wala
kikundi kingine chochote chenye malengo binafsi, Sendeka anaonekana kuvutia upande wa kundi fulani analolipenda
yeye akiwa amejitenga na Watanzania wote katika ujumla wao!
Katika
michango yake inayoonyeshwa moja kwa moja na vyombo vya habari, Tv na redio,
toka kwenye ukumbi wa Bunge, Dodoma,
Sendeka anaonekana anavyohaha kuhakikisha Katiba mpya inayotayarishwa
haikumbatii matakwa ya wananchi katika ujumla wao, isipokuwa matakwa ya kikundi
kidogo ambacho ni chama tawala, CCM!
Ni katika
harakati hizo za Sendeka kutaka Katiba ya nchi iegemee kwenye kundi lake,
ilipoandikwa kwenye vyombo vya habari kwamba mbunge huyo alimwaga machozi ndani
ya kikao cha wabunge wa CCM akiwataka wabunge hao wa chama chake wakubaliane
kutumia wingi wao kulazimisha kura ya wazi katika kuamua ni kitu gani kiingizwe
katika Katiba na kipi kiachwe! Ni hilo linalonifanya nijiulize, machozi hayo ya
Sendeka ni ya kiuzalendo au ni ya mamba?
Sababu
kawaida ukali wa mamba unakuwa majini, nje ya maji mamba si mjanja sana.
Anaweza akakiangalia kitu akitamani kiingie majini ili iwe nafuu kwake,
isipotokea hivyo anaanza kutoa machozi. Ila machozi hayo sio kwamba anakionea
huruma kitu hicho, ni machozi ya kusikitika kukikosa. Hayo ni machozi ya
hatari. Je, Sendeka naye anataka tumuamini hivyo?
Ieleweke
kwamba wajumbe wote wanaounda Bunge Maalumu kwa sasa majina yao wote yatabaki
kwenye historia ya nchi yetu, kwa heshima au kwa kudharauliwa. Iwapo
wataifanyia nchi yao kitu cha maana, kwa maana ya kuiandikia katiba nzuri kwa
manufaa ya wananchi wote bila mizengwe, sio kwamba ni sisi tu tulio hai kwa
wakati huu tutakaowaheshimu peke yetu, bali hata vizazi vijavyo. Lakini iwapo
watafanya kitu cha ovyo, wakatoa katiba isiyotamanika, watadharauliwa mpaka
mizimu yao na vizazi vijavyo.
Kwahiyo mtu
anapotaka kujitengenezea heshima yake binafsi itakayoonekana hata kwa vizazi
vijavyo, heshima isiyosahaulika kutokana na kutumia nafasi yake adimu ya wakati
huu kuvitendea haki vizazi vijavyo miaka mingi mbele, kwa nini alazimishwe
kufanya maamuzi kimkumbo kwa lengo la kuwanufaisha tu wanaojali faida ya sasa
peke yake bila kujali kama kuna kesho?
Ni lazima
kura ya wazi imekilenga kitu hicho tofauti na kura ya siri inayomfanya mtu
atafakari kwanza kwa kuangalia miaka mingi mbele kabla ya kufanya uamuzi. Kura
ya siri inajali leo na kesho, haiangalii mkumbo wa leo tu.
Kwahiyo mpaka
sasa bado sijaelewa ni uchungu gani uliomminya Sendeka mpaka mwanamume mzima
akamwaga machozi mbele ya wenzake. Hivi ni shabiki sana wa serikali mbili kiasi
cha kuhisi kwamba kura ya siri itawafanya hata walio wana CCM wapigie kura
serikali tatu kama ilivyopendekezwa kwenye Rasimu, kinyume na msimamo wa chama
chake? Je, anadhani zikiwa serikali tatu atapoteza uhai? Tuseme anaichukia Tanganyika au pengine ni hofu tu ya kukikosa alichokuwa akinufaika
nacho, au anachotaka kunufaika nacho binafsi, katika serikali mbili?
Na kama ana
mtazamo huo, mtazamo wa maslahi binafsi, huyo tunawezaje kumwita mzalendo wa
kweli? Na kwa nini tumwamini na kumuachia nafasi ya kutuamria mstakabali wa
nchi yetu mtu wa aina hiyo?
Sababu
mzalendo wa kweli ni yule anayefanya mambo akiwa ametanguliza maslahi ya nchi
yake na ya watu wake mpaka na ya vizazi vijavyo, mtu aliye tayari kuifia nchi
yake akiwa hayaangalii hata kidogo maslahi yake binafsi.
Huwezi
kusema kwamba mtu aliye tayari kuifia nchi yake anayajari maslahi yake binafsi,
maana akishakufa ndio unakuwa mwisho wa maslahi binafsi. Mtu wa aina hiyo
anafanya hivyo kwa kuyaangalia tu maslahi ya umma. Huyo ndiye mzalendo.
Kitendo cha
mtu mzima kulia akishinikiza matakwa yake yaende kinyume na mapendekezo ya umma
hakiwezi kuwa cha uzalendo hata kidogo. Uzalendo ni lazima uheshimu matakwa ya
umma.
Kwa ufupi, kitendo hicho cha Sendeka naweza kukiangalia
sawa na mtu anayemkatia mwanae bima ya maisha halafu akafanya mbinu kusudi
mwanae afe ili yeye akapate pesa ya bima! Hivyo ikitokea mtoto akaugua halafu akapona
baadaye mzazi akaanza kulia ni nani anaweza kuitafsiri siri ya kilio hicho cha
mzazi? Inaweza kuonekana anasukumwa na huruma kumlilia mwanae, lakini kiukweli
hayo ndiyo machozi ya mamba. Machozi ya kukosa.
Tunaweza
kuitumia Marekani kama mfano wa nchi kutofanya mambo kimkumbo, watu kufanya
mambo na maamuzi kwa manufaa halisi ya nchi na vizazi vyake, kizazi kilichopo
na kijacho.
Katiba ya
Marekani inayotumika mpaka sasa iliandikwa na watu wasiozidi 10 wakipata
ushauri toka kwa watu wasiozidi 63, mwaka 1787, na katiba hiyo kuanza kutumika
mwaka 1788. Mpaka leo katiba hiyo ina umri wa miaka 226. Katika kipindi chote
hicho yalipendekezwa marekebisho 33 lakini yakaridhiwa 27 tu.
Hiyo maana
yake ni kwamba watu wote wa Marekani waliopata nafasi ya kuwa viongozi, katika
kipindi chote hicho, walifanya kazi ya
uongozi bila kutanguliza maslahi
binafsi, waliangalia maslahi ya watu wote wa Marekani. Bila hivyo Katiba yao
ingekuwa inabadilishwa kila mara kulingana na matakwa ya viongozi waliopo kwa
wakati huo. Nadhani wangekuwa na mtu sampuli ya Sendeka angetengeneza bahari ya
machozi!
Hapa jambo
la kujiuliza ni kwamba pamoja na uchanga wetu na nchi yetu, hivi kweli
tunaamini kwamba Wamarekani wanatuzidi akili kwa kiasi chote hicho? Yaani akili
walizokuwa nazo Wamarekani mwaka 1787 hatujaweza kuzifikia hata baada ya miaka
226! Hata uzalendo waliokuwa nao kwa nchi yao bado sisi unatushinda!
Fikiria watu
wasiozidi 10, mwaka 1787 walitayarisha utaratibu wa kuiendesha nchi yao milele
yote, wakati sisi, zaidi ya watu 600, bado hawaonyeshi dalili za kutengeneza
utaratibu tunaoweza kuutumia walau kwa miaka 50 tu!
Wengi
wanaopata nafasi za kutengeneza utaratibu wa kuiongoza nchi yetu wanatumia
nafasi hizo kuangalia ni namna gani watajinufaisha nazo, kama anavyojaribu kufanya Ole Sendeka!
Kwa upande
mwingine nimemsikia mjumbe mmojawapo wa Bunge Maalumu akidai kwamba Katiba ya
Marekani haikupata maoni ya wananchi. Nasema pamoja na mtu huyo, tena msomi,
kuwa katika nafasi hiyo adhimu, wazo
lake hilo ni potofu. Marekani, kama
tunavyoifahamu, itakosaje Katiba yenye
maoni ya wananchi halafu Katiba hiyo
idumu kwa miaka 226? Na inawezekanaje Katiba isiyokuwa na maoni ya wananchi
iliwezeshe taifa kuwa na mafanikio ya kutugeuza sisi wengine ombaomba wao wa
kudumu?
Na je, kama
kweli sisi tunayajali maoni ya wananchi mbona maoni ya Watanzania yanayosema serikali
tatu yanapigwa vita na chama tawala? Hayo maoni ya wananchi ni ya nini yasiyotakiwa
kuheshimiwa na chama tawala?
Mimi naamini
kwamba wale Wamarekani 10 waliweka umimi pembeni na kuvaa roho za Wamarekani
wote, waliokuwepo wakati huo mpaka waliopo sasa hivi, wakaamua kufanya kazi
hiyo, tena kwa kujitolea. Hao ni tofauti na hawa wa kwetu zaidi ya 600 ambao
kipaumbele chao kilikuwa ni kuongezewa posho kwanza pamoja na ukweli kwamba
wanazopata ni kufuru tupu!
Zipo dalili
za wazi kwamba mtindo wa kuendesha au kupitisha mambo yanayowahusu wananchi na nchi kimkumbo ndio unaoweza kutumika hapa kufikia kuipitisha
Katiba Mpya. Mtindo huo unaoegemea kwenye wingi wa uwakilishi, unaweza
kuwafanya baadhi ya wawakilishi wetu wafanye maamuzi kimkumbo
wakiyaangalia maslahi binafsi kwa muda
uliopo tu!
Pengine ndiyo
maana tunaona muda wa Bunge Maalumu unacheleweshwa makusudi bila yeyote kutilia
maanani kuwa Watanzania wanatakiwa wamlipe kila mjumbe kiasi kisichopungua laki
tatu kila siku! Hata hivyo wajumbe hao wanaona kiasi hicho bado ni kidogo, walitaka,
na bado wengine wanataka, kiongezwe! Sababu wao wanaonekana wamepata
fursa ya kuvuna, mambo ya Katiba Mpya ni mengineyo!
Wajumbe wa
Bunge hili maalumu wametoka kwenye vyama vya siasa na makundi mengine
mbalimbali, ila wote walishauriwa kuuvua ukada wa vyama vyao na umakundi na
badala yake kuuvaa uzalendo. Sasa haya
yanayosemwa ya sera na itikadi za vyama yanatoka wapi? Mimi naamini kwamba
wajumbe wote wa Bunge Maalumu ni wananchi wazalendo, au wanaopaswa kuwa
wazalendo, hivyo tutengeneze Katiba yetu kwanza, sera na itikadi vije baadaye.
0784
989 512
BUKOBAWADAU
Bukoba Wadau ni mtandao unao toa habari na matukio yanayo tokea katika mji wa bukoba pamoja na mkoa wa kagera kwa ujumla.
Email:bukobawadau@gmail.com | Phone :Mc baraka:0784 505045, 0754 505043
Instagram @bukobawadau | Facebook @bukobawadau
