UFUNGUZI WA KAMBI YA WATOTO (ARIEL CAMP) ILIYOANDALIWA NA SHIRIKA LA AGPAHI
Ndugu,
·
Mgeni Rasmi, Mganga Mkuu (M) - Kagera,
·
Madaktari kutoka Chama cha Madaktari wa Watoto
Tanzania,
·
Meneja wa Mradi wa AGPAHI – Shinyanga & Simiyu,
·
Wafanyakazi wa AGPAHI,
·
Walezi wa Watoto,
·
Wadau mbalimbali wa Afya na Haki za Watoto,
·
Watoto wa Kambi ya Ariel, Waandishi wa Habari,
·
Wageni Waalikwa, Mabibi na Mabwana.
Habarini za asubuhi !
Ndugu Mgeni rasmi, Awali ya yote
napenda kutoa shukrani kwako kwa kuacha shughuli zako na kuja kujumuika na sisi
hapa kwenye Kambi ya Ariel (Ariel Camp). Tunasema asante sana!
Pia napenda kuwashukuru sana walezi
waliokuja na watoto toka Simiyu na Shinyanga. Vile vile napenda kuwashukuru
wafanyakazi wenzangu wa AGPAHI na wadau wengine kwa jitihada zao za hali na
mali katika kuandaa kambi hii ya watoto. Hii ni mara ya kwanza kwa AGPAHI
kuandaa kambi hii katika mkoa wa Kagera, tunafarijika sana kuwa hapa.
Ndugu Mgeni rasmi, Shirika la AGPAHI ni shirika lisilo la kiserikali
linaloendeshwa na watanzania na watanzania wenyewe ndio sisi hapa. Kuanzishwa kwa shirika linaloendeshwa na watanzania
ilitokana na dira ya serikali ya Tanzania na ile ya wafadhili yaani serikali ya Marekani kutaka wazawa
(serikali pamoja na mashirika yasiyo ya serikali) kuendesha miradi mbalimbali
inayoshughulikia masuala ya VVU na UKIMWI na masuala ya afya ya mama na mtoto
ili kuwa na miradi endelevu.
Shirika letu linatoa huduma katika mikoa ya
Shinyanga, Simiyu na Geita. Huduma zitolewazo ni pamoja na tiba na matunzo,
kuzuia maambukizi ya virusi toka kwa mama kwenda kwa mtoto na huduma za uzazi
wa mpango. Hadi mwezi Machi mwaka huu, AGPAHI imeweza kuandikisha
wateja 96,638 (wanaume 34,342 na wanawake 55,975) kwenye huduma za matunzo ambapo 6,321 ni watoto walio
chini ya umri wa miaka 15 na hii sawa ni asilimia 7.
Vilevile AGPAHI imeweza
kuwaanzishia dawa wateja wapatao 63,048 (wanaume 21,555 na
wanawake 36,969) kwenye huduma
za tiba ambapo watoto ni 4,524 ambayo ni sawa na asilimia 7.
Dira ya shirika ni kuhakikisha tunatokomeza
maambukizi ya virusi vya ukimwi kwa watoto na kuondoa UKIMWI kwa watoto. Katika
kutekeleza azma hiyo shughuli mbalimbali zinatekelezwa ikiwa ni pamoja na
kuwapatia watoto huduma za matunzo na matibabu pamoja na huduma za
kisaikolojia. Katika mikoa ya Shinyanga na Simiyu, kuna jumla ya watoto
694,454 kati yao
watoto 6,321 wanaishi na maambukizi ya Virusi vya Ukimwi.
Mgeni Rasmi, shirika
la AGPAHI lilianza huduma za malezi na kuwakutanisha watoto katika vikundi
vidogo vidogo baada ya kuanzishwa kwake. Vikundi hivi vipo katika vituo vya kutolea
huduma za afya ambapo hadi sasa tuna jumla ya vikundi vipatavyo 35 vyenye jumla
ya watoto 1,541.
Kutokana na kuundwa kwa vikundi hivyo, AGPAHI
iliweka utaratibu wa kuendesha kambi ili kuwakutanisha watoto kutoka kwenye
vikundi mbalimbali kwa lengo la kujifunza kuhusu afya na stadi za maisha na pia
kubadilishana uzoefu. Kambi hizi pia huwajenga watoto na kuwafanya mabalozi wa
huduma za watoto katika jamii. Kambi hizi za watoto zimekuwa zikifanyika mara
moja kwa mwaka; ambapo kwa mwaka huu tumeweza kufanikisha kuwa na kambi mbili.
Hii inamaanisha watoto wengi zaidi wanapata nafasi ya kushiriki kwenye kambi.
Kambi hii ni ya tano kufanyika na kauli mbiu ya
kambi hii ni “AGPAHI inajali watoto wakue na kuishi kwenye matumaini chanya.” Kambi za awali zilifanyika katika mikoa ya Pwani, Mwanza
na Kilimanjaro.
Mgeni Rasmi, Kambi
hii itafanyika kwa muda wa siku tano, leo ikiwa ni siku ya kwanza. Kambi ina
idadi ya watoto wapatao 57 wenye umri wa kuanzia miaka 8 hadi 17. Watoto hawa wanatoka katika vituo mbalimbali
kwenye halmashauri zote za mikoa ya Shinyanga na Simiyu.
Katika kipindi hiki cha wiki moja, watoto wataweza
kujifunza umuhimu wa vikundi vya watoto, namna ya kujenga tabia ya kutafuta
matibabu mbalimbali, umuhimu wa kujitambua, kufuatilia matibabu, ufuasi wa
dawa, elimu ya ujana na VVU, jinsi ya kuwasiliana, stadi za maisha na huduma ya
kisaikolojia.
Pamoja na mafunzo watakayojifunza katika kambi, watoto
pia watafanya matembezi na kuona mto Kagera, Kagera sugar
factory, makumbusho vita vya IDD AMIN na mpaka wa Tanzania na Uganda.
Ndugu mgeni rasmi, napenda kutoa shukrani zetu kwa
Watu wa Marekani kupitia shirika lao la CDC
ambao ndio wahisani wa kambi hii. Hata
hivyo tuna wafadhili wetu wengine kama EGPAF, UNFPA na USAID ambao nao
wanatusaidia katika kazi zetu. Pia shirika letu linafanya kazi kwa karibu sana
na ofisi ya Waziri Mkuu –TAMISEMI na Wizara ya Afya na Ustawi wa Jamii.
ASANTENI KWA KUNISIKILIZA!
Kaimu Mganga Mkuu wa Mkoa, Bw. Herman Kabirigi (Afisa Afya wa Mkoa wa Kagera) ambaye ndiye alikuwa Mgeni Rasmi katika ufunguzi wa kambi ya siku tano ya watoto (Ariel -Camp ) inayofanyika katika hotel ya ELCT Mjini Bukoba akihutubia.
Madaktari kutoka Chama cha Madaktari wa Watoto
Tanzania - Dr. Festo Manyama na Dr. Maimuna Ahmed katika hali ya Usikivu.
Bwana Jasson Lwankomezi ambaye ni mtaalam wa Saikolojia akitoa maelezo kwa watoto hao.
Bi Cecilia Yona akitoa ufafanuzi wakati wa kuanza kambi.
Watoto wakiwa tayari kujibu maswali .
Zoezi la utambulisho likiendelea
Pichani kushoto ni Dr. Scott Amos, Dr Maimuna Ahmed na Dr. Festo Manyama wakati wa utambulisho.
Bw. Milton Kuhoyelwa ambaye ni mhudumu wa afya kutoka Maswa akisalimia washiriki.
Muendelezo wa matukio wakati wafanyakazi wa AGPAHI na walezi wa watoto wakiwajibika
Dr. Festo Manyama akitolea jambo ufafanuzi
Bw. Gastor Njau akizungumza.
Mr. Mugisha akiwajibika katika kupata matukio kwa ajili ya kumbukumbu.
Wafanyakazi wa AGPAHI - Bi Jane Shuma na Bw. Emilian Ng'wandu.
Muonekano wa Menu husika.
Mmoja ya watoto akipata huduma ya Chakula
Waalikwa wakiendelea kupata huduma ya Chakula katika hotel ya ELCT Bukoba .
Watoto wakiwa katika michezo.
Kwenye viwanja vya Gymkhana Mjini Bukoba watoto hao wakionyesha uwezo wao katika kucheza mpira wa miguu.
Muendelezo wa matukio mbalimbali katika picha.
Watoto wakipata chai ya Jioni .
IFUATAYO NI HOTUBA FUPI YA MGENI RASMI KATIKA UFUNGUZI WA KAMBI YA WATOTO (ARIEL
CAMP) ILIYOFANYIKA ELCT BUKOBA HOTEL - 15/06/2015
·
Mkurugenzi Mtendaji wa AGPAHI,
·
Meneja Mradi wa AGPAHI – Shinyanga & Simiyu.,
·
Madaktari kutoka Chama cha Madaktari wa Watoto
Tanzania,
·
Wafanyakazi wa AGPAHI,
·
Walezi wa watoto
·
Watoto wa Kambi ya Ariel,
·
Waandishi wa Habari,
·
Wageni Waalikwa,
·
Mabibi na Mabwana
Napenda
kuushukuru uongozi wa Shirika la Ariel Glaser Pediatric AIDS Healthcare
Initiative (AGPAHI) kwa kuandaa kambi hii ya watoto hapa Bukoba na kunikaribisha
kuwa Mgeni Rasmi kwenye ufunguzi wa kambi hii.
Ninayo furaha kubwa sana kuwa nanyi hapa
na kwa niaba ya Idara ya Afya ya Mkoa wa Kagera. Nawakaribisha sana mkoani
kwetu!
Nimefahamishwa
kwamba, shirika la AGPAHI linafanya huduma hizi za kisaikolojia kwa watoto katika
mikoa ya Shinyanga na Simiyu tangu kuanzishwa kwake mwaka 2011.
Nawapongeza kwa
kuendelea kuunda vikundi vidogo vidogo vya watoto katika vituo vya kutolea huduma
za afya ambapo hadi sasa, mmenieleza mna jumla ya vikundi vipatavyo 35 (vyenye
watoto 1,541). Nafurahi pia kusikia kuwa wilaya zote za mikoa ya Shinyanga na
Simiyu zimewakilishwa katika kambi hii. Hii inaashiria kuwa AGPAHI inatambua
umuhimu na thamani ya huduma za kisaikolojia kwa watoto.
Pia nimefahamishwa
kuwa katika mikoa ya Shinyanga na Simiyu, kuna jumla ya watoto 694,451,kati yao
watoto 6,321 wanaishi na maambukizi ya virusi vya Ukimwi.
Nimefarijika
kusikia kwamba, kutokana na vikundi hivi vya huduma za kisaikolojia kwa watoto,
AGPAHI ilifanya juhudi za kuanzisha kambi za watoto ambazo hufanyika mara mbili
kwa mwaka. Kambi hii ya Kagera ni ya tano kufanyika chini ya uratibu wa shirika
la AGPAHI. Kambi mbili za mwanzo zilifanyika mkoani Mwanza na kambi ya tatu na
ya nne zilifanyika mkoani Kilimanjaro. Kambi hizi huwakutanisha watoto ili
kujifunza mambo mbali mbali kuhusu afya, stadi za maisha, kupata ushauri wa
kisaikolojia kutokana na changamoto wanazokutana nazo na pia huduma za kitabibu
kutoka kwa madaktari bingwa wa watoto katika kipindi cha kambi. Pia, kambi hizi
huwajenga vijana na kuwafanya mabalozi wa huduma za watoto katika jamii.
Vilevile, naomba
kuchukua fursa hii, kuwasihi watoto mzingatie masomo, kanuni za afya kama mnavyoelekezwa
na wataalam wa afya na endeleeni kuwa wanachama wazuri katika vikundi vya
watoto vinavyosimamiwa na AGPAHI.
Pia, ningependa
kuwashukuru walezi ambao wamesafiri na watoto kutoka mikoa ya Shinyanga na
Simiyu. Napenda mpeleke shukrani kwa walezi wengine waliobaki kwa kazi nzuri wanayoifanya
ya kuunda vikundi vya watoto, kuwalea watoto katika maadili mazuri ya
kitanzania na kuwaelimisha juu ya huduma za afya.
Mwisho ningependa
kuwatakia watoto wote kambi njema. Mzingatie mafunzo na nawatakieni kila heri
kwa safari ya kwenda kutembelea mto Kagera, kiwanda cha sukari Kagera, makumbusho
ya vita vya Idd Amin na mpaka wa Tanzania na Uganda siku ya Jumatano.
Baada ya kusema
hayo machache, sasa napenda kutamka rasmi kuwa, kambi ya Ariel 2015 mkoani
Kagera imefunguliwa.
ASANTENI KWA KUNISIKILIZA!
BUKOBAWADAU
Bukoba Wadau ni mtandao unao toa habari na matukio yanayo tokea katika mji wa bukoba pamoja na mkoa wa kagera kwa ujumla.
Email:bukobawadau@gmail.com | Phone :Mc baraka:0784 505045, 0754 505043
Instagram @bukobawadau | Facebook @bukobawadau
